Park-Meedale

     

    Do konnd ma rei noch Ergazenga

     

    An da Eifahrd vo Baisenga

     

    No isch do glei des ersch´d Maleer

     

    Mo kommad denn dia Audos her

     

    Dia do fir Chaos ond fir Schdao

     

    Sorgad – ja wia ka mer ao

     

     

     

    Glei weider en da Auberlin

     

    Do schdod a Audo emmerhin

     

    Ganz noh am Meierle entlang

     

    Do wuuds oam manchmol angschd on bang

     

    Bei Dag do isch´s a Hendernis

     

    Doch schlemmer ischd´s bei Finschdernis

     

     

     

    Ond Middags, des isch gar ed schee

     

    Schdod ofdmols frech an LKW

     

    Rollator oder Kenderwaaga

     

    Koe Rücksichd, s´schlegd mir uff da Maga

     

    Ond manchmol parkd do ao an Bus

     

    Wann isch denn mid deam Wahnsinn Schluss

     

     

     

    Zor Bergschdroß grad vo seld oms Egg

     

    Isch ällas vool, es hod koen Zwegg

     

    ed mol zom eischeera hods luft

     

    da Gegaverkehr fehrd uf da Gehweg nuff

     

    wenn do a Kend kond aus am Haus

     

    i will ed deega, wia des gohd aus

     

     

    Ao en da Bismarck schdandad schon

     

    Dia Audo´s vo da Sozialschdadzion

     

    Ma brauchd se dringend, mit Mobile

     

    Doch wo dia parkad, senn jo viele

     

    Hod bei da Planung wieder mol

     

    Dia Schdadd vergessa - isch des hohl

     

     

     

    Ond en da Kenigsberger Schdroß

     

    Do schdandad Reiha vo Audos

     

    Vom SUV bis zo ma Rädle

     

    Ond jeder parkd grad wia a Mädle

     

    De leidtragende hend grauße Nod

     

    Send´d Kender wo ma laufa lod

     

     

     

    Au d‘Gaischdroß isch en ganzer Lenge

     

    Äls zuaparkd, s´gied so manche Enge

     

    Mol lengks mol rechts, ond greiz ond quer

     

    Der Slalom isch waidagad schwer

     

    An manche Schdella muaß ma drugga

     

    do ka ma ed omms Egg rom gugga

     

     

     

    Vo do gohds glei zor Stehelin

     

    Des machd fier mi au gar koen Sinn

     

    Seid´s Maile-Areal vabaud

     

    Hod sich a Aohnaod zemmabraud

     

    Ob Handwerger, Bewohner, Gäschd

     

    sei´n Karra uff da Schdroß schdao lässd

     

     


     

     

    Dia Utta-Eberstein lässt wissa

     

    beim Fiehrerschei hend viele b´schissa

     

    Beim Bulach wia beim Dönerschdand

     

    Ond ao beim Scheidig ällerhand

     

    Schdelld´s Audo grad uff Schdroß da Ma

     

    Schdadd uff da leere Parkblatz na

     

     

     

    Dazuana blahnd aoser Schdadd

     

    Veil Heiser, dass ma Wohnraum hat

     

    Doch an dia Kärra vo de Leid

     

    Do deegd ma ed – send dia ed g´scheid

     

    Es woeß doch jedas Kend sogar

     

    Dass´d Audo´s mae weand – jedes Jahr

     

     

     

    Verkehrsschao-Rundgang ällesamt

     

    Da Ordschaftsrad ond s´Ordnongsamt

     

    Selbschd vo de hoagle Ohfallschdella

     

    hend d`Schdädder gar nix wissa wella

     

    s‘isch wia mid ällam was ons schdeerd

     

    dia wohnad ed do, mir send deane nix wert

     

     

     

    Ma keed em Flegga grad vaweila

     

    Ond faschd en jed´ra Schdroß doch heila

     

    Wa isch denn do em Flegga los?

     

    Worom parkd jeder uff da Schdroß?

     

    Wo ma doch hot em ei´gna Hof

     

    An Schdellplazz, der isch rießagroß

     

     

     

    Drom fordre i heid, arm ond reich

     

    Mensch, deegad doch ed nao an eich

     

    Machad dia Schdroßa wieder frei

     

    nemm´s Audo uff da Schdellblazz nei

     

    uff Grond on Boda wo Dir g´herd

    dass da Vakehr ohg´hendrad fehrd